قصيده : ثورتنا هتفضل مستمره

مش هيجيب حقك يا بلدى غير ولادك المخلصين
الغلابه والضحايا اللى ضاع منهم سنين
مش تقولِّى ابن باشا جاى بيهتف فى الميدان
ولا فل من الفلول باس ايدين وزير زمان
ولا ضحك على الدقون من عساكر فى الوزاره
واللى قالوا بلطجى ع البطل احمد حراره
اللى ضحُّى بضىّ عينه واللى ضاع عليه سنين
وانت جاى تجيبلى وزرا يحلفولى ميت يمين
يحلفوا زى اللى قال انه حاميلنا البلاد
اللى رجينا الميدان (((بالمشير))) هو الميلاد
وجه قتلنا مكان ما قولنا الجيش والشعب ايد واحده
وسيِّب علينا كلاب زمان اتاريه معاهم ايد واحده
يمين ايه بقى اللى معاليك خليتهم يحلفوه
آدى الحرامى واللى عليكم انكم تصدقوه
صدّقنا كتير ونبحنا صوتنا علشان يكون فيه تغير
ومات اخواتنا وقولى انت تفتكر كان فيه بديل
مات اللى مات ضحّى اللى ضحّى ولا شايف انا فيه جديد
قالوا علينا شباب مندفعه واللى قال شباب عنيد
وده اعترافى انى عنيد وانى اندفعت وانى كمان بلطجى وواخد فلوس
طيب هو انت لما شهدت علشان رئيسك مش كنت برده واخد فلوس
دوس دوس دوس دوس وعدِّى ما أنا مش قدك ولا انت أدِّى
انا مواطن غلبان شَريف وكل همِّى عاوز عداله
وانت بقى خدت اللى خدته وداريت على رؤساء زباله
ليه يا مصر مكشره شوفى عملوا ايه ولادك
اللى مات واللى ضحى واللى جمِّل من صفاتك
وهنفضل نهتف وندافع حتى لو فضلت ايامنا مره
وطول ما الفساد هيفضل راسخ ثورتنا هتفضل مستمره
ــــــــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــــــ
كلمات : شريف محمد

زائر

تسلم ايد اللى كاتبها واللى نقلها بجد حلوه اوى والله

زائر

7elwa awe ya kber w tslm edak

زائر

ما شاء الله فعلا تسلم ايد اللى كاتبها وفعلا والله كلامها صحيح جدا المشير خان الشعب وباعنا علشان مبارك